Дзіцячыя вобразы ў апавяданнях Маргарыты Латышкевіч

Апавяданне “Пачатак восені”. Яно аб захапленні першаклашак - на першы погляд, аб прыгажосці сонечнага восеньскага дня - на першы погляд, аб дзіцячых радасцях ад новых уражанняў - на першы погляд. Але толькі на першы погляд. Як і ўсе папярэднія апавяданні - яно значна глыбейшае. Гэта нібы назіранне дарослага за дзецьмі. Але ў гэтым апавяданні адчуваецца нейкі сум, які з'явіўся ад неасцярожнага нядобрага слова дарослага, сказанага маленькаму дзіцяці, які робіць нешта не заўсёды свядома, але тут жа атрымлівае ацэнку сваім дзеянням ці сваім паводзінам. І гэтая ацэнка ўплывае на яго, на тое, якім дарослым ён стане. І што гэтая ацэнка важна ўжо для шасцігадовага дзіцяці, таму што ў гэтым узросце дзеці «атрымліваюць» набор сацыяльных нормаў, яны чакаюць рэакцыі ад навакольнага свету ў адказ на праявы свайго, пакуль яшчэ маленькага, але такога ўжо значнага, свету.